Finiş havası
UEFA Avropa Liqasının H qrupundakı Azərbaycan təmsilçisi “Qarabağ” beşinci oyununu keçirib. Noyabrın 30-u Norveçdə “Molde” ilə görüşən komanda sülh bağlayıb – 2:2.
“Haken” (İsveç) – “Bayer” (Almaniya) matçında 0:2 hesabı qeydə alınıb.
Beş turdan sonra “Bayer” 15, “Qarabağ” və “Molde” 7 xal götürüb, “Haken” xalsızdır.
Son oyun günü – dekabrın 14-də “Qarabağ” “Haken”i, “Bayer” “Molde”ni qəbul edəcək.
Qrupda birinci yeri tutan 1/8 finala, ikinci yeri tutan 1/16 finala vəsiqə alır, üçüncü yeri titan Konfrans Liqasının 1/16 finalına ələnir.
2023-2024 mövsümünə Çempionlar Liqasının birinci mərhələsində start verən “Qarabağ” ikinci raundda ilişib, Avropa Liqasına köçərək iki mərhələ adlayıb və qrup raunduna vəsiqə alıb.
1951-ci ildə Ağdamda yaradılan “Qarabağ” (“Məhsul”, “Şəfəq”, “Kooperator” adları da daşıyıb) 1 dəfə Azərbaycan SSR-in, 10 dəfə müstəqil Azərbaycanın çempionu olub, 7 dəfə Azərbaycan kubokunu qazanıb.
“Qarabağ” 19-cu dəfədir UEFA-nın əsas klub turnirlərində yarışır, 2014-cü ildən başlayaraq təsnifat mərhələlərini keçib.
2014-2015, 2015-2016, 2016-2017, 2018-2019, 2019-2020, 2020-2021 mövsümlərinə Çempionlar Liqasında başlayan “Qarabağ” sonra Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümündə “Qarabağ” Konfrans Liqasının 1/16 finalına qədər irəliləyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına adlayıb, sonra Konfrans Liqasına ələnib və 1/16 finalda uduzub.
