FİFA reytinqi
FİFA noyabrın 30-da milli futbol komandalarının reytinqini yeniləyib. Oyunların əhəmiyyəti, rəqiblərin çəkisi nəzərə alınmaqla əldə edilən nəticələrə əsaslanan reytinqdə Azərbaycan 210 yığma arasında 114-cü yerdə qərar tutur.
İran 21-ci, Ukrayna 22-ci, Türkiyə 37-ci, Rusiya 38-ci, Özbəkistan 68-ci, Gürcüstan 77-ci, Ermənistan 93-cü, Belarus 95-ci, Qırğızıstan 98-ci, Qazaxıstan 100-cü, Tacikistan 106-cı, Estoniya 122-ci, Latviya 137-ci, Litva 138-ci, Türkmənistan 141-ci, Moldova 155-ci pillədədir.
Beynəlxalq turnirlərdə start götürdüyü 1994-cü ildən bəri Azərbaycanın milli futbol komandası dörd Avropa çempionatının seçmə mərhələsini qrupda sonuncu, dörd Avropa çempionatının seçmə mərhələsini sondan əvvəlki pillədə bitirib.
Dörd dünya çempionatının seçmə mərhələsində yığma qrupda sonuncu, iki dünya çempionatının seçmə mərhələsində sondan əvvəlki, bir dünya çempionatının seçmə mərhələsində axırdan üçüncü pilləni tutub.
Yığma bir yol Millətlər Liqasının ən aşağı divizionunda qrup ikincisi olub, sondan yuxarı divizionunda bir yol üçüncü, bir yol ikinci yerdə qərarlaşıb.
Milli komandaya 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç, 2020-2023-cü illərdə Canni De Byazi baş məşqçilik edib.
