Əziz Orucova ittiham
Noyabrın 27-də “Kanal 13” internet televiziyasının direktoru Əziz Orucov tutulub. “Turan”ın məlumatına görə, jurnalistə mülkiyyət, istifadə və ya icarə hüququ olmadan torpaq sahəsi üzərində özbaşına tikinti aparma ittihamı irəli sürülüb. Əziz Orucovun Bakının 20-ci sahə ərazisində qanunsuz ev tikdiyi iddia olunur.
Polis əməkdaşlarının noyabrın 27-si axşam jurnalistin evində və “Kanal 13”ün ofisində axtarış apardığı, iki noutbukun, bir mobil telefonun, bəzi sənədlərin götürüldüyü xəbər verilir.
Noyabrın 28-də Səbail Rayon Məhkəməsi Əziz Orucov barəsində 3 aylıq həbs qətimkan tədbiri seçib.
Əziz Orucov 2017-2018-ci illərdə həbsdə olub. O, dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilinərək 6 il müddətinə azadlıqdan məhrum edilib, sonra cəza 6 ildən 3 ilə endirilib, eyni zamanda şərti həbslə əvəzlənib. 2020-ci ildə onun üzərindən məhkumluq götürülüb.
Novator.az bildirir ki, ötən həftə ölkədə üç jurnalist həbs edilib. Noyabrın 20-də “Abzas Media” internet nəşrinin direktoru Ülvi Həsənli və onun köməkçisi Məhəmməd Kekalov, noyabrın 21-də baş redaktor Sevinc Vaqifqızı tutulub, hər üç jurnalistə qabaqcadan əlbir olan bir qrup şəxsin qaçaqmalçılıq törətməsi ittihamı verilib.
