Xarici valyutada əmanət və depozitlər nə qədər azalıb?
Mərkəzi Bank doqquz aylıq pul siyasəti icmalı yayıb. Hesabata görə, 2023-cü ilin yanvar-sentyabr aylarında manatla pul bazası (dövriyyədəki pul vəsaitləri, habelə kommersiya banklarının Mərkəzi Bankdakı müxbir hesablarında vəsaitləri) 2,5 faiz, dövriyyədəki nağd pulun (bank sistemindən kənarda nağd pul, bankların kassalarında və bankomatlarda olan pullar) həcmi 9,8 faiz artıb.
Xarici valyutada əmanət və depozitlərin həcmində 33,3 faiz azalma qeydə alındığı, onun cəmi əmanət və depozitlərdə xüsusi çəkisinin 32,4 faizə endiyi bildirilir.
Nağdsız valyuta bazarında əməliyyatların həcmində azalma 6 faiz, nağd xarici valyutanın alqı-satqısı üzrə əməliyyatların həcmində 29,2 faiz göstərilir.
Doqquz ayda manatın Türkiyə lirəsi, Qazaxıstan təngəsi, Rusiya rublu, Yaponiya yeni, Çin yuanına qarşı bahalaşdığı, avro, İngiltərə funt sterlinqi, İsveçrə frankı və Gürcüstan larisinə qarşı ucuzlaşdığı vurğulanır.
