Canni De Byazi getdi
AFFA İcraiyyə Komitəsinin 22 noyabr iclasında Azərbaycan milli komandasının baş məşqçisi məsələsinə baxılıb, italyan Canni De Byazi postdan ayrılıb.
Novator.az bildirir ki, Canni De Byazi yığmaya 2020-ci il iyulun 10-dan italyan baş məşqçilik edib, milli onun rəhbərliyi ilə 39 matç keçirib: 10 qələbə, 8 heç-heçə, 21 məğlubiyyət.
2020-ci ildə Millətlər Liqasının C divizionunda yarışan yığma 4 komandalıq qrupu 3-cü yerdə bitirib.
2022-ci ilin dünya çempionatının seçmə mərhələsində milli 5 komandalıq qrupu sonuncu pillədə tamamlayıb.
2022-ci ildə Millətlər Liqasının C divizionunda yarışan yığma 4 komandalıq qrupu 2-ci yerdə bitirib.
2024-cü ilin Avropa çempionatının seçmə mərhələsində yığma 5 komandalıq qrupda dördüncü olub.
1956-cı il təvəllüdlü Canni De Byazi ölkəsində bir çox klubun, o cümlədən “İnter”, “Peskara”, “Breşia”, “Palermo”, “Viçensa” komandalarının yarımmüdafiəçi olub.
Məşqçi kimi Canni De Byazi bir çox komandada, o cümlədən İtaliyanın “Karpi”, SPAL, “Modena”, “Breşia”, “Torino”, “Udineze”, İspaniyanın “Levante”, “Alaves” klublarında çalışıb, Albaniya milli komandasına baş məşqçilik edib.
Milli komandanın sükanı arxasında 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov, 1999-2000-ci illərdə Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov, 2019-cu ildə Nikola Yurçeviç dayanıb.
