On ayın xarici ticarəti
Azərbaycanın on aylıq xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, 2023-cü ilin yanvar-oktyabr aylarında 193 ölkə ilə ticarət aparılıb, 29,3 milyard dollarlıq ixrac, 14,1 milyard dollarlıq idxal rəsmiləşib, büdcəyə 5,2 milyard manat vəsait ödənib.
Yanvar və iyunda 1,8 milyard, fevralda 2,6 milyard, martda 3,2 milyard, apreldə 4,8 milyard, may və avqustda 3,5 milyard, iyul və oktyabrda 2,8 milyard, sentyabrda 2,1 milyard dollarlıq ixrac qeydə alınıb.
İdxal göstəriciləri belədir: yanvar və sentyabr – 1,4 milyard dollar, fevral və aprel – 1,2 milyard dollar, mart, iyun və iyul – 1,3 milyard dollar, may, avqust və oktyabr – 1,5 milyard dollar.
İxracın 90,7 faizi neft-qaz sektoruna aid olub, idxalda ən böyük pay maşın, mexanizm, elektrik aparatları, avadanlıqlar və onların hissələrini əhatə edib: 19,9 faiz.
Məlumata əsasən, ixracın 4,6 faizi MDB ölkələrinə, 64,3 faizi Avropa İttifaqı ölkələrinə, 31,1 faizi başqa ölkələrə yönəlib, idxalda MDB-nin payı 27,3 faiz, Avropa İttifaqının payı 17,7 faiz, başqa ölkələrin payı 55 faiz olub.
İxracda əsas üç tərəfdaş mövqeyində İtaliya, Türkiyə və İsrail, idxalda Çin, Rusiya və Türkiyə qərar tutub.
