İxrac-idxal incəlikləri
Azərbaycan 2023-cü ilin yanvar-oktyabr aylarında 2,7 milyard dollarlıq qeyri-neft məhsulu ixrac edib. Novator.az bildirir ki, hesabatı yayan Dövlət Gömrük Komitəsi meyvə-tərəvəz ixracını 544,4 milyon, plastmas və ondan hazırlanan məmulatlar ixracını 399,4 milyon, elektrik enerjisi ixracını 348,1 milyon, kimya sənayesi məhsulları ixracını 200 milyon, alüminium və ondan hazırlanan məmulatlar ixracını 166,5 milyon dollarla ilk beşlikdə göstərir.
Qeyri-neft ixracında əsas beş ünvan belə sıralanır: Rusiya, Türkiyə, Gürcüstan, İsveçrə, Qazaxıstan.
On ayda 14,1 milyard dollarlıq idxal rəsmiləşib. İlk beşlikdə yer alan maşın, mexanizm, elektrik aparatları, avadanlıqlar və onların hissələri üzrə 2,8 milyard dollar, nəqliyyat vasitələri və onların hissələri üzrə 2,2 milyard dollar, yeyinti məhsulları üzrə 1,7 milyard dollar, qara metallar və onlardan hazırlanan məmulatlar üzrə 913,3 milyon dollar, əczaçılıq məhsulları üzrə 482,2 milyon dollarlıq idxal qeydə alınıb.
