Bir oxunuş bitdi
Milli Məclis 13-15 noyabr iclaslarında 2024-cü ilin büdcə zərfini müzakirə edərək layihələrə ilk oxunuşda xeyir-dua verib.
Dövlət büdcəsi layihəsində gəlirlər 34 milyard 173 milyon manat, xərclər 36 milyard 763 milyon manat göstərilir.
Dövlət Sosial Müdafiə Fondunun büdcəsində gəlirlər və xərclər 6 milyard 919 milyon 860 min manat, işsizlikdən sığorta fondunun büdcəsində 238 milyon manat nəzərdə tutulur.
2024-cü il üçün yaşayış minimumu və ünvanlı dövlət sosial yardımının təyin edilməsi məqsədilə ehtiyac meyarının həddi 270 manat götürülür.
Novator.az bildirir ki, parlamentin daxili nizamnaməsinə görə, prezidentin təqdimatı ilə diplomatik nümayəndəliklərin təsis edilməsi, inzibati ərazi bölgüsü, dövlət təltifləri, dövlətlərarası və Azərbaycan qanunlarından fərqli qaydalar nəzərdə tutan hökumətlərarası müqavilələrin təsdiqi və ləğvi barədə, uyğunlaşdırma məqsədi ilə hazırlanmış, həmçinin ad və digər texniki xarakter daşıyan dəyişiklikləri (müddət, məbləğ, yaş senzi ilə bağlı, həmçinin subyektlərin hüquqi vəziyyətinə təsir edən, hüquq məsuliyyətini yaradan və ya aradan qaldıran, yüngülləşdirən və ya ağırlaşdıran dəyişikliklər istisna olmaqla) nəzərdə tutan qanun layihələrinə bir oxunuşda, qalan qanun layihələrinə üç oxunuşda baxılır.
Qanun Milli Məclisdə qəbul edildiyi gündən 14 gün müddətində imzalanmaq üçün prezidentə təqdim olunmalıdır.
Prezident qanunları ona təqdim olunmuş gündən başlayaraq 56 gün ərzində imzalamalı, ya da öz etirazları ilə birlikdə Milli Məclisə qaytarmalıdır.
