Bankların sayı 23-ə düşür
Mərkəzi Bankın İdarə Heyəti “Muğanbank” ASC-nin lisenziyasını ləğv edib. Oktyabrın 19-da qüvvəyə minən qərarla banka müvəqqəti inzibatçı təyin olunub. Qurumun müflisləşmə yolu ilə ləğvinə məhkəmə qərar verməlidir.
Rəsmi açıqlamaya görə, “Muğanbank”ın bank sisteminin aktivlərində xüsusi çəkisi 1,4 faiz, kredit portfelində 2 faiz, sektorun öhdəliklərində 1,3 faizdir.
2023-cü ilin üçüncü rübünün sonuna bank üzrə sığortalanmış (kompensasiya olunan) əmanətlər 216,7 milyon manat göstərilir.
“Əmanətlərin sığortalanması haqqında” qanuna əsasən, fiziki şəxslərin qorunan əmanətləri üzrə kompensasiya məbləği 100 min manatdır (xarici valyutada 100 min manat ekvivalentində). Sahibkarlıq fəaliyyəti ilə məşğul olan fiziki şəxslərin bank hesablarındakı vəsaitlərin maksimum 20 min manatı, notariusların depozit hesablarında qalmış, fiziki şəxslərə məxsus pul vəsaitləri tam məbləğdə sığortalanır.
Novator.az bildirir ki, 1992-ci il noyabrın 25-də lisenziya almış “Muğanbank”ın sıradan çıxması ilə Azərbaycanda bankların sayı 23-ə düşür:
“Accessbank”
“AFB Bank”
Azərbaycan Beynəlxalq Bankı
Azərbaycan Sənaye Bankı
“Azər-Türk Bank”
“Bank Avrasiya”
“Bank BTB”
“Bank of Baku”
“Bank Respublika”
“Bank VTB” (Azərbaycan)
“Expressbank”
“Xalq Bank”
“Kapital Bank”
Milli İran Bankının Bakı filialı
“Naxçıvanbank”
“Paşa Bank”
“Premium Bank”
“Rabitəbank”
“Turanbank”
“Unibank”
“Yapı Kredi Bank Azərbaycan”
“Yelo Bank”
“Ziraat Bank Azərbaycan”.
