Avropadan yeni cərimələr
Avropa İnsan Hüquqları Məhkəməsi oktyabrın 19-da Azərbaycandan şikayətlər üzrə qərar və qərardadlar elan edib.
Bloqçu Mehman Hüseynov ölkədən çıxışına qadağadan şikayətçi olub. Ərizəçinin Avropa İnsan Hüquqları Konvensiyası ilə qorunan hərəkət azadlığı hüququnun pozuntusunu etiraf edən Azərbaycan dövləti ona 5 min avro təzminat ödəməlidir.
Məhkəməyə yığıncaqlar və birləşmək azadlığı hüququnun pozuntusu iddiası ilə üz tutmuş siyasətçi Azər Qasımlıya 2850 avro təzminat ödənməsinə qərar verilib.
Eyni iddia ilə şikayət eləmiş Şakir Əhmədov, Bəxtiyar Hüseynov, İsmayıl Həsənovun hər biri dövlətdən 4150 avro, Araz Məmmədov, Ramiz Cəfərov, Cabbar Savalanlı, Nemət Abbasov, Nurlan Eldarov, Füzuli Hüseynov, Cavid İbrahimov və Saqif Qurbanovun hər biri 2850 avro təzminat alacaq.
Azadlıq və toxunulmazlıq hüququnun pozuntusu iddiası ilə şikayət vermiş Samir Əliyevə 5600 avro, Elnur Cabbarov və Kənan Əliyevin hər birinə 3500 avro təzminat ödənməlidir.
Ədalətli məhkəmə hüququnun pozulduğu tanınan Emil Maniyev, Emin Axundov, Tərlan Muradov və Rəşad Abbasovun hər birinə 1250, Bəşir Tarıverdiyev və Cavid Hacıbəylinin hər birinə isə 2250 avro təzminat verilməlidir.
Xəbəri Aihmaz.org yayıb.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
