Qaliblər və iddiaçılar
2024-cü ilin Avropa futbol çempionatının seçmə mərhələsi 10 qrupda aparılır, finala ilk iki yeri tutanlar çıxır. Novator.az bildirir ki, oktyabrın 18-dək iki qrupda qaliblər bəllidir: A qrupunda İspaniya və Şotlandiya, F qrupunda Belçika və Avstriya.
B qrupunda bir bilet Fransaya qismət olub, digərini ya Niderland, ya da Yunanıstan əldə edə bilər.
C qrupunda İngiltərə səddi aşıb, o biri vəsiqə uğrunda Ukrayna və İtaliya çarpışır.
D qrupunda Türkiyə final bileti götürüb, o birinə Uels, Xorvatiya və Ermənistan iddia edir.
J qrupunda Portuqaliya finala çıxıb, o biri vəsiqəyə Slovakiya, Lüksemburq və İslandiya şanslıdır.
E qrupunda Albaniya, Çexiya, Polşa və Moldovanın, G qrupunda Macarıstan, Serbiya və Monteneqronun, H qrupunda Sloveniya, Danimarka və Qazaxıstanın, İ qrupunda Rumıniya, İsveçrə, İsrail və Kosovonun finala adlamaq imkanı qalır.
Ev sahibi Almaniya final raunduna birbaşa vəsiqə alıb, daha 3 vəsiqə UEFA Millətlər Liqasının ən güclü komandalarına ayrılıb.
1960-cı ildə SSRİ, 1964, 2008 və 2012-ci illərdə İspaniya, 1968 və 2021-ci illərdə İtaliya, 1972, 1980 və 1996-cı illərdə Almaniya (Qərbi Almaniya), 1976-cı ildə Çexoslovakiya, 1984 və 2000-ci illərdə Fransa, 1988-ci ildə Niderland, 1992-ci ildə Danimarka, 2004-cü ildə Yunanıstan, 2016-cı ildə Portuqaliya Avropa çempionu olub.
