Büdcənin seçki pulu
2024-cü ilin dövlət büdcəsi layihəsində seçkilərin keçirilməsi və statistika tədbirləri üçün 110,9 milyon manatdan çox vəsait nəzərdə tutulur. Novator.az bildirir ki, 2024-cü ildə ölkədə parlament və bələdiyyə seçkiləri keçirilməlidir.
Azərbaycanda parlamentin səlahiyyət müddəti 5 ildir. Ancaq konstitusiyaya əsasən, növbədənkənar seçkidə seçilən parlamentin səlahiyyət müddəti 5 ildən az ola bilər. Bu halda növbəti parlament seçkisi növbədənkənar seçkidə seçilən parlamentin səlahiyyət müddətinin beşinci ilinin noyabr ayının birinci bazar gününə düşür. 2020-ci il fevralın 9-da seçilən parlamentin səlahiyyət müddətinin beşinci ili 2024-cü ilə təsadüf edir və həmin il noyabr ayının birinci bazar günü – noyabrın 3-də yeni parlament seçilməlidir.
Ölkədə bələdiyyələr 5 il müddətinə seçilir. Sonuncu seçkilər 2019-cu il dekabrın 23-də olub. Gələn ilin bələdiyyə seçkilərinin dekabrın 22-də keçirilməsi gözlənir.
