“Qarabağ”: 50-yə nə qaldı?
Azərbaycanın “Qarabağ” komandası UEFA-nın tərtib etdiyi klublar reytinqində 60-cı pilləni bölüşür. Ağdam təmsilçisi Türkiyənin “Fənərbaxça” və Yunanıstanın PAOK komandaları ilə eyni əmsala sahibdir: 26,000.
Futbol icmalçısı Rasim Mövsümzadə Novator.az-a deyib ki, reytinq Çempionlar Liqası, Avropa Liqası və Konfrans Liqasının son beş mövsümündə əldə olunan nəticələrə əsaslanır: “Hər üç turnirin qrup mərhələsindən başlayaraq qələbə 2, heç-heçə 1 xaldır (Avropa Liqası və Konfrans Liqasında 1/16 final matçları istisna olmaqla). Konfrans Liqasının təsnifat mərhələlərində ələnən komanda minimum 1, maksimum 2,5 xal alır. Turnirlərdə qrup mərhələsindən başlayaraq finala qədər bonus xalları da nəzərdə tutulur”.
Hazırda reytinqə İngiltərənin “Mançester Siti” komandasına başçılıq edir. İlk onluqda “Bavariya” (Almaniya), “Real” (İspaniya), PSJ (Fransa), “Liverpul” (İngiltərə), “Çelsi” (İngiltərə), “Mançester Yunayted” (İngiltərə), “İnter” (İtaliya), “Leypsiq” (Almaniya), “Sevilya” (İspaniya) komandaları da var.
“Qarabağ” 19 dəfə UEFA-nın əsas klub turnirlərinə vəsiqə alıb, 2014-cü ildən başlayaraq təsnifat mərhələlərini keçib.
2014-2015, 2015-2016, 2016-2017, 2018-2019, 2019-2020, 2020-2021 mövsümlərinə Çempionlar Liqasında başlayan “Qarabağ” sonra Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümündə “Qarabağ” Konfrans Liqasının 1/16 finalına qədər irəliləyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına adlayıb, sonra Konfrans Liqasına ələnib və 1/16 finalda uduzub.
2023-2024 mövsümünə Çempionlar Liqasında başlayan “Qarabağ” hazırda Avropa Liqasının qrup mərhələsində yarışır.
