İlk dövrənin iki lideri
Azərbaycanın milli futbol çempionatının yüksək dəstəsində (premyer liqa) 2023-2024 mövsümünün ilk dövrəsi bitib. 9 turdan sonra “Zirə” və “Qarabağ” 19, “Səbail” 17, “Araz-Naxçıvan” 14, “Neftçi” 12, “Turan Tovuz” və “Sumqayıt” 11, “Sabah” və “Qəbələ” 7, “Kəpəz” 5 xal yığıb.
Dörd dövrəlik yarış 2024-cü il mayın 26-da bitəcək, çempion UEFA Çempionlar Liqasına, gümüş və bürünc mükafatçılar Konfrans Liqasına dəvət alacaq, sonuncu pilləni tutan premyer liqanı tərk edəcək.
İki və daha artıq komandanın topladığı xallar bərabər olarsa, qalib bu göstəricilər əsasında müəyyən ediləcək: komandaların öz aralarında keçirdikləri oyunların nəticələri; komandaların öz aralarında keçirdikləri oyunlarda top fərqi (səfər qolu nəzərə alınmır); mövsüm ərzində ən çox qələbə qazanmış komanda; bütün oyunlarda vurulmuş və buraxılmış topların fərqi; bütün görüşlərdə vurulmuş topların sayı; ən az rəsmi xəbərdarlıq (sarı və qırmızı vərəqələr).
Bütün göstəricilər eyni olsa, püşk atılacaq.
1992-ci ildən başlayaraq Azərbaycan milli çempionatında 8 komanda qızıl medallara sahib çıxıb: “Qarabağ” 10, “Neftçi” 9, “Kəpəz” 3, “Şəmkir”, “Bakı” və “İnter” (indiki “Şamaxı”) 2, “Turan” (Tovuz) və “Xəzər Lənkəran” 1 dəfə çempion olub.
