Qanunların qəbulu: yenilik var
Milli Məclis daxili nizamnaməsini qismən yeniləyir. 6 oktyabr iclasında qəbul edilən layihədə bir oxunuşda baxılmalı qanun layihələrinin dairəsi belə müəyyən olunur: prezidentin təqdimatı ilə diplomatik nümayəndəliklərin təsis edilməsi, inzibati ərazi bölgüsü, dövlət təltifləri, dövlətlərarası və Azərbaycan qanunlarından fərqli qaydalar nəzərdə tutan hökumətlərarası müqavilələrin təsdiqi və ləğvi barədə, uyğunlaşdırma məqsədi ilə hazırlanmış, həmçinin ad və digər texniki xarakter daşıyan dəyişiklikləri (müddət, məbləğ, yaş senzi ilə bağlı, həmçinin subyektlərin hüquqi vəziyyətinə təsir edən, hüquq məsuliyyətini yaradan və ya aradan qaldıran, yüngülləşdirən və ya ağırlaşdıran dəyişikliklər istisna olmaqla) nəzərdə tutan qanun layihələri.
Qalan qanun layihələrinə üç oxunuşda baxılır.
Konstitusiyaya əsasən, qanun Milli Məclisdə qəbul edildiyi gündən 14 gün müddətində imzalanmaq üçün prezidentə təqdim olunmalıdır.
Prezident qanunları ona təqdim olunmuş gündən başlayaraq 56 gün ərzində imzalamalı, ya da öz etirazları ilə birlikdə Milli Məclisə qaytarmalıdır.
