Yevlaxda
Qarabağın erməni sakinlərinin nümayəndələri sentyabrın 21-də Azərbaycan rəsmiləri ilə görüşmək üçün Yevlax şəhərinə gəliblər. Görüş Qarabağ ermənilərinin Azərbaycana reinteqrasiya məsələlərinin müzakirəsi məqsədi daşıyıb.
Azərbaycanın Qarabağda yaşayan ermənilərlə təmaslar üzrə məsul şəxsi deputat Ramin Məmmədovdur. AZƏRTAC xəbər verir ki, görüşdə Azərbaycan hakimiyyətini Ramin Məmmədov, Qarabağın işğaldan azad edilmiş ərazilərində (Şuşa rayonu istisna olmaqla) prezidentin xüsusi nümayəndəsinin müavini Bəşir Hacıyev və xüsusi nümayəndəliyin əməkdaşı İlkin Sultanov, Qarabağın erməni sakinlərini Sergey Martirosyan və David Melkumyan təmsil ediblər. Rusiya sülhməramlı kontingentinin nümayəndəsi də görüşə qatılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi özünü “Dağlıq Qarabağ Respublikası” və ya “Arsax Respublikası” adlandıran işğalçı rejimin nəzarətindədir. Sentyabrın 19-da Azərbaycan Silahlı Qüvvələri Qarabağda hərbi əməliyyata başlayıb. Sentyabrın 20-də ermənilər silahı yerə qoymaq, tam şəkildə tərksilah olmaq öhdəliyi götürüb.
