Avropa İnsan Hüquqları Məhkəməsi sentyabrın 21-də Azərbaycandan şikayətlər üzrə qərar və qərardadlar açıqlayıb. Aihmaz.org-un məlumatına görə, ölkədən çıxışlarına yasaqdan şikayət vermiş jurnalistlər Natiq Cavadlı, Aytac Əhmədova və Aynur Qənbərovanın Avropa İnsan Hüquqları Konvensiyası ilə qorunan hərəkət azadlığına və səmərəli hüquqi müdafiə vasitələri hüququna müdaxilə tanınıb. Qərara görə, Azərbaycan dövləti ərizəçilərin hər birinə 5500 avro təzminat ödəməlidir.

İnzibati cəzalardan şikayət etmiş 36 nəfərin hər biri dövlətdən 1250 avro, 2 nəfərin hər biri 3500 avro, 1 nəfər 5000 avro, 1 nəfər 2250 avro, həbsdən şikayət etmiş 1 nəfər 3500 avro təzminat alacaq.

Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir. Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.