İlham Əliyev şərti açıqladı
ABŞ-ın dövlət katibi Entoni Blinken sentyabrın 19-da prezident İlham Əliyevə zəng edib. Rəsmi məlumata görə, telefon söhbətində Qarabağ bölgəsindəki vəziyyət müzakirə olunub. İlham Əliyev Ermənistan silahlı qüvvələrinin Qarabağda terror məqsədilə minalar quraşdırması, nəticədə mülki şəxslərin və polis əməkdaşlarının həlak olması, həmçinin Azərbaycan Ordusunun bölmələrinin atəşə tutulması faktlarını qeyd edib.
Prezident Qarabağda qondarma “prezident seçkisi” kimi hərəkətlərin Azərbaycanın suverenliyinə qarşı məqsədyönlü təxribatların davamı olduğunu vurğulayıb, deyib ki, təxribatçı və təhrikçi əməllərin qarşısının alınması üçün Azərbaycan bölgədə lokal xarakterli antiterror tədbirlərinə başlamalı olub, mülki əhali və infrastruktur obyektləri hədəfə alınmır, yalnız legitim hərbi hədəflər sıradan çıxarılır.
Qarabağ bölgəsində yaşayan erməni sakinlərin nümayəndələrinin reinteqrasiya məsələlərini müzakirə etmək üçün bir neçə dəfə dialoqa dəvət olunduğu, lakin onların imtina etdiyi, bununla belə lokal xarakterli antiterror tədbirlərinin davam etdiyi vaxtda onların bir daha dialoqa dəvətin edildiyi diqqətə çatdırılıb. Dövlət başçısı silahın yerə qoyulduğu və tərksilah olunduğu halda antiterror tədbirlərinin dayandırılacağını deyib.
