Yerevan meriyasında mandat bölgüsü
Yerevan Şəhər Şurasına ilkin mandat bölgüsü açıqlanıb. Novator.az bildirir ki, sentyabrın 17-də keçirilmiş seçkidə hakim Vətəndaş Sazişi Partiyası 65 nəfərlik şuraya 24 mandat əldə edib.
Milli Yüksəliş Partiyası 14, Ana Ermənistan bloku 12, Respublika Partiyası 8, İctimai Səs Partiyası 7 mandatla göstərilir.
Mer seçilmək üçün 33 mandat gərəkdir. Bu posta Vətəndaş Sazişi Partiyasından Tiqran Avinyan (2018-2021-ci illərdə baş nazirin müavini olub, 2022-ci ildən Yerevan merinin müavinidir), Milli Yüksəliş Partiyasından Ayk Marutyan (2018-2021-ci illərdə Yerevanın meri olub), Ana Ermənistan blokundan Andranik Tevanyan (2021-2023-cü illərdə parlamentin deputatı olub), Respublika Partiyasından Artak Zeynalyan (2018-2019-cu illərdə ədliyyə naziri olub), İctimai Səs Partiyasından Artak Qalstyan namizəddir.
Vətəndaş Sazişi Partiyasına baş nazir Nikol Paşinyan sədrlik edir. O, 2018-ci il mayın 8-dən hökumət başçısıdır.
