İşğalçı rejimdə təyinat
Azərbaycanın Qarabağ bölgəsindəki işğalçı rejimin başçısı Samvel Şahramanyan sentyabrın 18-də Artur Arutunyanı “dövlət naziri” təyin edib.
Artur Arutunyan 1979-cu ildə doğulub.
“Dövlət naziri” işğalçı rejimdə hökumət başçısı sayılır, ancaq “xarici işlər naziri”, “müdafiə naziri”, “daxili işlər naziri” Artur Arutunyana tabe edilməyib.
Novator.az bildirir ki, 1978-ci il təvəllüdlü Samvel Şahramanyan sentyabrın 9-u “parlamentdə” “prezident” seçilib. Əvvəllər rejimin “Milli Təhlükəsizlik Xidmətinin direktoru”, “hərbi vətənpərvərlik, gənclər, idman və turizm naziri”, “Təhlükəsizlik Şurasının katibi”, “dövlət naziri” olub.
Ermənistan 1988-ci ildə Azərbaycanın Dağlıq Qarabağ bölgəsini (indiki Xankəndi şəhəri, Şuşa, Xocalı, Xocavənd rayonları və keçmiş Ağdərə rayonu) özünə birləşdirmək üçün təcavüzə başlayıb. 1991-ci ildə bölgə “müstəqil dövlət” elan edilib, bunun ardınca müharibə alovlanıb. 1994-cü ildə elan olunan atəşkəsə qədər Ermənistan Azərbaycan ərazilərinin altıda birini işğal edib.
2020-ci ildə Azərbaycanın apardığı müharibə nəticəsində ərazilərin böyük hissəsi azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi özünü “Dağlıq Qarabağ Respublikası” və ya “Arsax Respublikası” adlandıran rejimin əlində qalır. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.
Müxtəlif illərdə rejimə Leonard Petrosyan (iki dəfə), Artur Mkrtçyan, Georgi Petrosyan, Robert Köçəryan, Arkadi Qukasyan, Bako Saakyan və Araik Arutunyan rəhbərlik edib.
