Bloqçu niyə tutulub?
Bloqçu Cəmil Məmmədli avqustun 24-də həbs edilib. Qərarı Sumqayıt Ağır Cinayətlər Məhkəməsi çıxarıb.
“Turan”ın məlumatına görə, bloqçuya qabaqcadan əlbir olan bir qrup şəxsin dələduzluğu, qabaqcadan əlbir olan bir qrup şəxsin hədə-qorxu ilə tələb etməsi, ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq ittihamları irəli sürülüb.
Media hüquqçusu Xalid Ağalıyev yazır ki, Cəmil Məmmədli son 2 il yarımda müxtəlif məhkəmə davalarına tuş gəlib: “Onu əvvəlcə Quba Rayon İcra Hakimiyyətinin başçısı məhkəməyə verib, bloqçu islah işləri cəzasına məhkum edilib. Bu işə hazırda Avropa İnsan Hüquqları Məhkəməsində baxılır.
Cəmil Məmmədlini daha sonra Xaçmazda 2010-cu ildə qətlə yetirilmiş iş adamının yaxınları xüsusi ittiham qaydasında məhkəməyə verib, o, 2 il islah işləri cəzası alıb. Hazırda həmin işə apellyasiya instansiyasındadır.
15 dekabr 2022-ci ildə Xaçmazda Cəmil Məmmədlinin də iştirakı ilə insident baş verib, bloqçu xuliqanlığa görə cinayət ittihamı ilə polis nəzarətinə verilib.
21 dekabr 2022-ci ildə bloqçuya dələduzluq ittihamı irəli sürülüb, 31 yanvar 2023-cü ildə cinayət işləri birləşdirilib, işə hədə-qorxu ilə tələb etmə ittihamı əlavə olunub.
Cinayət işinə Sumqayıt Ağır Cinayətlər Məhkəməsində baxılır. Avqustun 24-də keçirilən hazırlıq iclasında bloqçu haqda həbs qətimkan tədbiri seçilib. Qərar bloqçunun mediada cinayət işi ilə bağlı birtərəfli açıqlamalar verməsi ilə əsaslandırılıb”.
