Qrupa doğru…
Azərbaycanın “Qarabağ” komandası UEFA Avropa Liqasının ikinci raundunun ilk matçını keçirib. Novator.az bildirir ki, avqustun 24-ü Sloveniyada “Olimpiya” ilə üz-üzə gələn “Qarabağ” rəqibini yenərək (2:0) qrup mərhələsinə vəsiqəni yaxınlaşdırıb.
Cavab oyununa avqustun 31-də Bakı ev sahibliyi edəcək.
2023-2024 mövsümünə Çempionlar Liqasında başlayan “Qarabağ” birinci raundda Cəbəllütariq “Linkoln”unu ələyib, ikinci raundda “Rakov”a (Polşa) yenilib, Avropa Liqasına köçərək ilk mərhələdə HİK-i (Finlandiya) mübarizədən kənarlaşdırıb.
1951-ci ildə Ağdamda yaradılan “Qarabağ” (“Məhsul”, “Şəfəq”, “Kooperator” adları da daşıyıb) 1 dəfə Azərbaycan SSR-in, 10 dəfə müstəqil Azərbaycanın çempionu olub, 7 dəfə Azərbaycan kubokunu qazanıb.
“Qarabağ” 19-cu dəfədir UEFA-nın əsas klub turnirlərində yarışır, 2014-cü ildən başlayaraq təsnifat mərhələlərini keçib.
2014-2015, 2015-2016, 2016-2017, 2018-2019, 2019-2020, 2020-2021 mövsümlərinə Çempionlar Liqasında başlayan “Qarabağ” sonra Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümündə “Qarabağ” Konfrans Liqasının 1/16 finalına qədər irəliləyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına adlayıb, sonra Konfrans Liqasına ələnib və 1/16 finalda uduzub.
