Ziyarət, ziyarət anonsu
Özbəkistan prezidenti Şövkət Mirziyayevin Azərbaycana dövlət səfəri davam edir. Avqustun 22-də Bakıya gələn ali qonaq Azərbaycan prezidenti İlham Əliyevlə təkbətək və geniş tərkibdə bir araya gəlib, Azərbaycan-Özbəkistan sənədləri imzalanıb.
AZƏRTAC-ın məlumatına görə, həmin gün prezidentlər jurnalistlər qarşısında çıxış ediblər. İlham Əliyev deyib ki, görüşlərdə qarşılıqlı fəaliyyətin möhkəmlənməsi istiqamətində bütün nailiyyətlər ətraflı təhlil edilib, eləcə də bütün sahələrdə gələcək inkişaf yolları müəyyən olunub.
Dövlət başçısı qeyd edib ki, avqustun 23-ü Füzuli şəhərində Özbəkistanın tikdiyi məktəb açılacaq: “Bu, Qarabağın bərpası işində xarici dövlətin ilk hədiyyəsidir və biz bu qardaşlıq, həmrəylik, dəstək jestini çox yüksək dəyərləndiririk. Bu məktəb əslində bir təhsil sarayıdır. Mən may ayında Füzulidə olarkən tikintinin gedişi ilə tanış oldum və Özbəkistanın bizə təqdim etdiyi həmin dost töhfəsinin miqyasını əyani şəkildə gördüm. Məktəb özbək xalqının dahi oğlu Mirzə Uluqbəyin adını daşıyır və əminəm ki, bu, təkcə təhsil ocağı deyil, eləcə də bizim dost və qardaşlığımızın daha bir mərkəzi olacaq.
Bir neçə gün əvvəl Füzuli şəhərinin ilk sakinləri – keçmiş köçkünlər doğma yurdlarına qayıdıblar. Artıq yaxın zamanlarda uşaqlar Özbəkistandan olan qardaşlarımızın hədiyyə etdiyi məktəbdə oxumağa başlayacaqlar”.
1957-ci il təvəllüdlü Şövkət Mirziyayev 2003-cı il dekabrın 12-dən baş nazir postunu tutub, 2016-cı il sentyabrın 8-dən prezident səlahiyyətlərini icra edib, həmin il dekabrın 4-də və 2021-ci il oktyabrın 24-də prezident seçilib.
2023-cü ildə prezidentin səlahiyyət müddəti 5 ildən 7 ilə qaldırılıb, iyulun 9-da keçirilmiş növbədənkənar prezident seçkisini Şövkət Mirziyayev udub.
