Mirziyayev gəldi
Özbəkistan prezidenti Şövkət Mirziyayev avqustun 22-də Azərbaycana dövlət səfərinə gəlib. AZƏRTAC xəbər verir ki, paytaxt Bakının beynəlxalq aeroportunda ali qonağı və xanımını baş nazirin birinci müavini Yaqub Eyyubov, xarici işlər nazirinin müavini Elnur Məmmədov və digər rəsmi şəxslər qarşılayıb.
1957-ci il təvəllüdlü Şövkət Mirziyayev Daşkənd İrriqasiya və Meliorasiya İnstitutunu bitirib, həmin təhsil ocağında elmi işçi, baş müəllim, dosent, prorektor vəzifələrində çalışıb. Texnika elmləri namizədidir.
Özbəkistan Ali Sovetinin, Ali Məclisin deputatı, Daşkəndin Mirzə-Uluqbəy rayonunun, Cizak və Səmərqənd vilayətlərinin icra hakimi olub.
2003-cı il dekabrın 12-dən baş nazir postunu tutub, 2016-cı il sentyabrın 8-dən prezident səlahiyyətlərini icra edib, həmin il dekabrın 4-də və 2021-ci il oktyabrın 24-də prezident seçilib.
2023-cü ildə prezidentin səlahiyyət müddəti 5 ildən 7 ilə qaldırılıb, iyulun 9-da keçirilmiş növbədənkənar prezident seçkisini Şövkət Mirziyayev udub.
