İlkin Süleymanov prosesində fasilə
Gəncə Apellyasiya Məhkəməsi qətldə təqsirli bilinən İlkin Süleymanovun işi üzrə prosesi təxirə salıb.
2019-ci il noyabrın 21-də 10 yaşlı Nərmin Quliyeva yaşadığı Tovuz rayonunun Dondar Quşçu kəndində itkin düşüb. 2020-ci il yanvarın 6-sı kənddə onun yandırılmış meyiti tapılıb.
Bu işə görə Dondar Quşçu kəndinin sakini, 1973-cü il təvəllüdlü İlkin Süleymanov tutulub.
Gəncə Ağır Cinayətlər Məhkəməsi 2023-cü il iyunun 5-də İlkin Süleymanova 18 il müddətinə azadlıqdan məhrumetmə cəzası kəsib.
İlkin Süleymanov Nərmin Quliyevanın ölümünə aidiyyəti olmadığını deyir, qeyd edir ki, 2020-ci il yanvarın 6-dan 10-na qədər Tovuz Rayon Polis Şöbəsində işgəncəyə məruz qaldığı üçün ittihamı etiraf ifadəsinə imza atıb.
Gəncə Apellyasiya Məhkəməsinə üz tutan İlkin Süleymanov məhkəmədən bəraət istəyir.
APA-nın 22 avqust məlumatına görə, Gəncə Apellyasiya Məhkəməsi cinayət işini Gəncə Ağır Cinayətlər Məhkəməsinə qaytarıb. Bu, Nərmin Quliyevanın atası Şərif Quliyevin hökmdən verdiyi apellyasiya şikayəti ilə bağlıdır. İlkin Süleymanova ömürlük həbs cəzası verilməsini istəyən Şərif Quliyev şikayəti prosessual müddət başa çatdıqdan sonra təqdim edib. Bu halda müddətin bərpası məsələsinə birinci instansiya məhkəməsi baxmalıdır.
