Rusiyanın dron oğurluğu – “Nyu-York Tayms”
“Rusiya İran dronunun surətini çıxardıb Ukrayna müharibəsində istifadə edir”. Novator.az-ın məlumatına görə, “Nyu-York Tayms” qəzetində çıxan yazıda belə deyilir.
Xatırladılır ki, 2022-ci ilin fevralından Ukraynada total müharibə aparan Rusiya həmin ilin avqustundan döyüşlərdə İranın “Şahed-136” tipli zərbə dronlarından da yararlanır: “Sentyabr ayından isə Rusiya Ukraynaya həmçinin “Geran-2” dronları ilə zərbə endirir”.
Rusiyanın “Geran-2”ni özünün yeni məhsulu kimi təqdim etdiyini, amma indiyədək bir neçə dəfə mediada bu zərbə dronunun əslində “Şahed-136”nın azacıq dəyişdirilmiş versiyası olduğu haqda xəbərlərin dolaşdığını yada salan “Nyu-York Tayms” vurğulayır ki, savaş meydanlarında işlədilən silahları çözələyən “Conflict Armament Research” təşkilatı bu iddiaları birmənalı təsdiqləyib. Qəzetin yazdığına görə, mərkəzi qərargahı Böyük Britaniyada yerləşən təşkilatın ekspertləri belə bir qəti qənaətə “Geran-2” dronlarının Ukrayna ərazisindən toplanmış qalıqlarını analiz etməklə gəlib.
“Nyu-York Tayms” xəbər verir ki, “Geran-2”nin mahiyyətcə elə “Şahed-136” olduğu “Conflict Armament Research” təşkilatının 2023-cü il avqustun 10-da yaydığı geniş hesabatda əksini tapıb.
2022-ci ilin avqustundan Rusiyanın İrandan yüzlərlə zərbə dronu aldığı bildirilir. 2023-cü ilin may ayında ABŞ-ın Milli Təhlükəsizlik Şurasının sözçüsü Con Kirbi deyib ki, Rusiya İrandan aldığı zərbə dronların 400-dən çoxunu Ukrayna müharibəsində işlədib.
2022-ci ilin noyabrında “Vaşinqton Post”, 2023-cü ilin fevralında isə digər Amerika qəzeti – “Wall Street Journal” yazmışdı ki, İran dronlarının Rusiya ərazisində istehsalı planı da var.
“Vaşinqton Post”un məlumatına görə, bu istiqamətdə Tehranla Moskva arasında 2022-ci ilin noyabrında saziş bağlanıb və istehsal prosesinin tezliklə, bir neçə aya başlanması barədə razılıq əldə edilib.
“Wall Street Journal”ın yazdığına görə isə 2023-cü ilin yanvarında İranın yüksək çinli rəsmilərindən ibarət nümayəndə heyəti Rusiyaya yollanıb, bir neçə ilə ən azı 6000 dron istehsal etmək gücündə yeni zavodun tikintisi məsələsini müzakirə edib.
2022-cilin sonundan ABŞ İran dronlarının və dron hissələrinin, texnologiyalarının Rusiyaya axınını dayandırmaq üçün bir sıra sanksiyalar tətbiq edib.
“Şahed-136” və “Geran-2” zərbə dronlarına “kamikadze dronları” da deyirlər, çünki hədəfə zərbə endirəndə özü də məhv olur.
“Nyu-York Tayms” qəzetinin yazdığına görə, “Conflict Armament Research” təşkilatının ekspertləri belə düşünür ki, Rusiya hərbi xərclərə mümkün qədər qənaət etmək məqsədilə İran dronunun surətini çıxarmaq işinə girişib.
Rusiya 2014-cü ildə Ukraynanın Krım bölgəsini tam, Donetsk və Luqansk bölgələrini qismən işğal edib. 2022-ci il fevralın 24-də Ukraynada total hərbi əməliyyatlar aparan Rusiya ölkənin həm Donetsk, Luqansk, həm də Zaporojye və Xerson bölgələrində yeni ərazilər ələ keçirib.
Mənbə: Nytimes.com
