Üç oyunda iki qələbə
UEFA turnirlərinin 2023-2024 mövsümündə yarışan Azərbaycan klubları avqustun 10-da növbəti oyunlarını keçirib. Novator.az bildirir ki, Avropa Liqasının ilk təsnifat raundunda yer alan “Qarabağ” HİK-i (Finlandiya) məğlub edib – 2:1.
Konfrans Liqasının üçüncü mərhələsində mübarizə aparan “Sabah” Serbiya “Partizan”ına üstün gəlib (2:0), “Neftçi” Türkiyə “Beşiktaş”ına yenilib (1:3).
Hər üç matça Bakı ev sahibliyi edib. Cavab oyunları avqustun 17-nə təyin olunub.
Raundu keçsə, “Qarabağ” ikinci mərhələdə “Olimpiya” (Sloveniya) və “Qalatasaray” (Türkiyə) komandalarından birinə, ələnəcəyi halda Konfrans Liqasına köçərək son təsnifat mərhələsində ya “Farul”a (Rumıniya), ya da “Flora”ya (Estoniya) rəqib olacaq.
Mərhələni adlasa, son ələmə raundunda “Neftçi” ya Yunanıstandan “Aris”, ya da Ukraynadan “Dinamo”, “Sabah” ya Rumıniyadan “Styaua”, ya da Danimarkadan “Nordsyaelland” ilə görüşəcək.
2023-2024 mövsümünə Çempionlar Liqasının birinci mərhələsində start verən “Qarabağ” ikinci mərhələdə ələnib.
Konfrans Liqasındakı təmsilçilər turnirə ikinci mərhələdən qoşulublar, “Qəbələ” raundu keçə bilməyib.
