Cəmil Həsənliyə iş təklifləri
Alim, ictimai-siyasi xadim Cəmil Həsənli London Universitetinin Tarix Araşdırmaları İnstitutu və ABŞ-ın Harvard Universitetinin Devis Mərkəzindən işə dəvət alıb. Londondakı tədris ocağı onu baş elmi işçi vəzifəsinə təyin edib. Cəmil Həsənli orada iki il dəvətli tədqiqatçı kimi fəaliyyət göstərib.
Dəvət xəbərini yayan AXCP sədri Əli Kərimli qeyd edir ki, Azərbaycan hakimiyyəti Cəmil Həsənlinin hətta orta məktəblərin birində əməkhaqqı almadan dərs demək təklifini də geri çevirib: “Cəmil Həsənli rəsmi dəvətlərə baxmayaraq nə Londona, nə də ABŞ-a gedəcək. Bakıda qalıb, özünün dediyi kimi, “qaragünlü millətinin” sözçüsü olmaqda davam edəcək. Bizim də xalq olaraq borcumuz ömrünü elmə, azadlıq və ədalət mübarizəsinə həsr etmiş ləyaqətli insana haqq etdiyi dəyəri, dəstəyi verməkdir”.
Novator.az bildirir ki, 1952-ci il təvəllüdlü Cəmil Həsənli tarix elmləri doktorudur. Bakı Dövlət Universitetinin müəllimi, baş müəllimi, dosenti və professoru olub.
1993-cü ilin aprel-sentyabr aylarında Azərbaycan prezidentinin müşaviri vəzifəsini tutub.
AXCP sədrinin müavini olub, 2000 və 2005-ci illərdə Milli Məclisin deputatı seçilib.
2013-cü ildə Demokratik Qüvvələrin Milli Şurasının prezidentliyə namizədi olub. Həmin qurumun sədridir.
ABŞ-da və Böyük Britaniyada elmi-pedaqoji fəaliyyət göstərib.
