111 ölkəyə ixrac, 177 ölkədən idxal
Dövlət Statistika Komitəsi yarım illik xarici ticarət hesabatı yayıb. Rəsmi məlumata görə, 2023-cü ilin yanvar-iyun aylarında Azərbaycanın hüquqi və fiziki şəxsləri 187 ölkədəki tərəfdaşları ilə ticarət əməliyyatları həyata keçirib, 111 ölkəyə ixrac, 177 ölkədən idxal qeydə alınıb.
2022-ci ilin yanvar-iyun ayları ilə müqayisədə xarici ticarət dövriyyəsinin faktiki qiymətlərlə 11,4 faiz azaldığı, real ifadədə 2,5 faiz, o cümlədən idxalın 8,5 faiz, ixracın 0,6 faiz artdığı bildirilir.
Hesabata əsasən, ölkənin xarici ticarət dövriyyəsinin 32,8 faizi İtaliya, 15 faizi Türkiyə, 8,3 faizi Rusiya, 5,1 faizi Çin, 3,3 faizi Almaniya, 3,1 faizi Yunanıstan, qalan hissəsi başqa ölkələrlə aparılmış ticarət əməliyyatlarının payına düşüb.
İxrac ünvanlarının ilk üçlüyündə İtaliya, Türkiyə, Yunanıstan, idxal mənbələrinin ilk üçlüyündə Rusiya, Çin, Türkiyə yer alır.
