İşğalçı rejimin “parlamentində” daşnak “sədr”
Avqustun 7-də Azərbaycanın Yuxarı Qarabağ bölgəsindəki işğalçı rejimin “parlamenti” yeni “sədr” seçib: David İşxanyan.
Novator.az bildirir ki, 1968-ci il təvəllüdlü David İşxanyan “parlamentdə” Daşnaksütun Partiyasını təmsil edir.
Əvvəlki “sədr” Artur Tovmasyan iyulun 29-da istefaya gedib.
1988-ci ildə Yuxarı (Dağlıq) Qarabağ erməniləri bölgənin Ermənistana verilməsi tələbi ilə separatçı hərəkata başlayıb. 1991-ci ildə bölgə “müstəqil dövlət” elan edilib, bunun ardınca müharibə alovlanıb. 1994-cü ildə elan olunan atəşkəsə qədər Ermənistan Azərbaycan ərazilərinin altıda birini işğal edib.
2020-ci il sentyabrın 27-dən noyabrın 10-dək Azərbaycanın apardığı müharibə və savaş nəticəsində əldə edilən razılaşmalar, sonrakı lokal hərbi əməliyyatlarla ərazilərin böyük hissəsi azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi özünü “Dağlıq Qarabağ Respublikası” və ya “Arsax Respublikası” adlandıran rejimin işğalında qalır. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.
Sədərək rayonunun 1, Qazax rayonunun 7 kəndi Ermənistanın əlindədir.
