Bölgə səfəri
Prezident İlham Əliyev avqustun 7-də bölgə səfərinə çıxıb. AZƏRTAC xəbər verir ki, dövlət başçısı Qazax rayonunda yenidən qurulan Qarapapaq-Çaylı avtomobil yolunun açılışında iştirak edib, Sərhəd Qoşunlarının “Qazax” əlahiddə sərhəd diviziyasının qarnizon kompleksində yaradılan şəraitlə tanış olub.
İlham Əliyev Qazax Müəllimlər Seminariyası – ADA Universitetinin Qazax Mərkəzinə baş çəkib, Qazax şəhərinin su təchizatı və kanalizasiya sistemlərinin istismara verilməsi mərasiminə və “Venzana” mebel fabrikinin açılışına qatılıb.
Prezidentin iştirakı ilə Gəncə-Qazax-Gürcüstan yolunun 102 kilometrlik Gəncə-Qazaxbəyli hissəsi istifadəyə verilib.
İlham Əliyev sonra Şəmkir rayonuna səfər edib. O, Şəmkir şəhərində Məhəmməd Füzuli adına təbiət və humanitar fənlər təmayüllü tam orta məktəb-liseyin yeni binasının açılışına qatılıb, ardınca Samux rayonuna səfər başlayıb. Prezidentin Samux Rayon Mərkəzi Xəstəxanasının və Sərkar kənd uşaq musiqi məktəbinin yeni binalarının açılışlarında iştirak etdiyi bildirilir.
