Ermənistanda Qarabağ sorğusu
“Gallup” beynəlxalq ictimai rəy təşkilatının Ermənistan nümayəndəliyi iyulun 27-dən 31-dək 1100 nəfər arasında telefon sorğusu keçirib. Novator.az bildirir ki, rəsmi hesabata görə, respondentlərin 94,4 faizi Dağlıq (Yuxarı) Qarabağ bölgəsinin Azərbaycanın tərkibində olmasının əleyhinə çıxıb, 3,8 faizi buna razılaşıb, 1,8 faizi mövqe bildirməyə çətinlik çəkdiyini deyib.
1988-ci ildə Yuxarı Qarabağ erməniləri bölgənin Ermənistana verilməsi tələbi ilə təcavüzə başlayıb. 1991-ci ildə bölgə “müstəqil dövlət” elan edilib, bunun ardınca müharibə alovlanıb. 1994-cü ildə elan olunan atəşkəsə qədər Ermənistan Azərbaycan ərazilərinin altıda birini işğal edib.
2020-ci il sentyabrın 27-dən noyabrın 10-dək Azərbaycanın apardığı müharibə və savaş nəticəsində əldə edilən razılaşmalar, sonrakı lokal hərbi əməliyyatlarla ərazilərin böyük hissəsi azad olunub.
Yuxarı Qarabağa və bölgədən Ermənistana gedən Laçın yoluna Rusiyanın hərbi kontingenti nəzarət edir, Xankəndi şəhəri, Şuşa rayonunun 1 qəsəbəsi, 34 kəndi, Xocavənd şəhəri, rayonun 1 qəsəbəsi, 45 kəndi, Xocalı şəhəri, rayonun 1 qəsəbəsi, 43 kəndi, Ağdərə şəhəri və keçmiş Ağdərə rayonunun 35 kəndi özünü “Dağlıq Qarabağ Respublikası” və ya “Arsax Respublikası” adlandıran separatçı rejimin işğalında qalır.
Sədərək rayonunun 1, Qazax rayonunun 7 kəndi Ermənistanın əlindədir.
