Elxan Əliyevin şikayəti, qərar
Avqustun 4-də Bakı Apellyasiya Məhkəməsi AXCP təşkilat şöbəsinin funksioneri Elxan Əliyevin həbsindən şikayətə baxıb. Şikayət təmin olunmayıb.
Novator.az-ın məlumatına görə, prosesdə çıxış edən Elxan Əliyev ittihamı qurama saydığını deyib, həbsini siyasi fəaliyyəti ilə əlaqələndirib.
Cəbhəçini iyulun 26-da Sabunçu Rayon Polis İdarəsinin əməkdaşları tutub. İyulun 27-də Sabunçu Rayon Məhkəməsi onun barəsində 3 aylıq həbs qətimkan tədbiri seçib.
Bakı İstintaq Təcridxanasında saxlanan partiya fəalı daha iki nəfərlə birgə külli miqdarda ziyan vurmaqla dələduzluq, hüquq verən rəsmi sənədi saxtalaşdırma və bilə-bilə saxta sənədlərdən istifadə etmədə təqsirli bilinir. Onların Nardaran qəsəbəsində bir nəfərə saxta sənədlə 57000 min manata torpaq sahəsi satdığı bəyan olunub.
Elxan Əliyev Bakı Apellyasiya Məhkəməsindəki 4 avqust prosesində deyib ki, torpaq sahəsinin satışında yalnız vasitəçilik eləyib, hər hansı qanunsuz əmələ, o cümlədən sənəd saxtakarlığına heç bir dəxli yoxdur. O, AXCP-nin təşkilatlanması işində fəallığına görə hədələndiyini, yekunda şərlənərək tutulduğunu vurğulayıb.
Cinayət Məcəlləsinə görə, külli miqdarda ziyan vurmaqla dələduzluq 5 ildən 10 ilədək müddətə azadlıqdan məhrumetmə ilə cəzalandırılır.
Hüquq verən rəsmi sənədi saxtalaşdırmanın maksimum cəzası 2 ilədək müddətə azadlıqdan məhrumetmədir.
Bilə-bilə saxta sənədlərdən istifadə etməyə maksimum 1 ilədək müddətə azadlıqdan məhrumetmə cəzası düşür.
