“Azərenerji”yə ucuzlaşma təklifi
İqtisadçı, müxalif REAL Partiyasının funksioneri Natiq Cəfərli elektrik enerjisini ucuzlaşdırmağa çağırır. Novator.az-ın məlumatına görə, o yazır ki, “Azərenerji” Açıq Səhmdar Cəmiyyəti 2022-ci ili 436,5 milyon manat xalis mənfəətlə başa vurub: “Bu, satışdan gəlirlərin 2021-ci illə müqayisədə 43,7 faiz artmasının nəticəsidir. Yaxşı göstəricidir, amma dövlət şirkətinin yüksək mənfəətlə işləməsi vacib deyil, öz xərclərini ödəməsi, ziyanla işləməməsi şərtdir.
Biz hamımız faktiki olaraq “Azərenerji”nin səhmdarıyıq, vətəndaşlardan yığılan vergi hesabına büdcədən illərdir şirkətə yüz milyonlarla vəsait ayrılıb, infrastrukturu qurulub, avadanlıqlar alınıb, xətlər çəkilib, təmir işləri görülüb, deməli, biz hamımız bu işdə pay sahibiyik. İndi şirkət mənfəətə çıxıbsa, deməli, öz “səhmdarları” – vətəndaşlarla bu mənfəəti bölüşməlidir. Yəni şirkət əhali üçün topdan satdığı enerji qiymətlərini azı 15-20 faiz aşağı sala bilər, bu zaman dövlətin əlində olan pərakəndə paylayıcı şirkətlər də elektrik enerjisini ucuzlaşdırmalıdır. Bu işin iqtisadi fəlsəfəsi budur – ziyan edəndə hamımız ziyanı vergilərlə ödəyiriksə, xalis mənfəətdə də əhalinin qiymət azalması ilə payı olmalıdır”.
Elektrik enerjisi: əhaliyə bu tariflərlə satılır: 200 kilovat-saatadək (200 kilovat-saat daxil) istehlak – kilovat-saatı 8 qəpik; 200 kilovat-saatdan 300 kilovat-saatadək (300 kilovat-saat daxil) istehlak – kilovat-saatı 9 qəpik; 300 kilovat-saatdan çox istehlak – kilovat-saatı 13 qəpik.
Qiymətləri iqtisadiyyat nazirinin sədrlik etdiyi kollegial orqan – Tarif Şurası müəyyən edir.
