Hüseyn Məlik azadlığa çıxdı
Azərbaycan Demokratiya və Rifah (ADR) Partiyasının İdarə Heyətinin üzvü Hüseyn Məlik avqustun 3-də Daxili İşlər Nazirliyinin Binəqədi rayonundakı inzibati həbs məntəqəsindən azadlığa buraxılıb.
Novator.az bildirir ki, Hüseyn Məlik iyulun 14-ü paytaxtın 3-cü mikrorayon dairəsi yaxınlığında avtomobilindən düşürülərək tutulmuş, həmin gün Nəsimi Rayon Məhkəməsi ona 20 sutkalıq inzibati həbs cəzası kəsmiş, Bakı Apellyasiya Məhkəməsi iyulun 21-də cəzanı qüvvədə saxlamışdı.
Hüseyn Məlik polis işçisinin qanuni tələbinə qəsdən tabe olmamaqda təqsirli bilinib. Ancaq partiyadaşları həbsi Hüseyn Məlikin siyasi fəaliyyəti ilə bağlayır.
Hüseyn Məlik milli azadlıq hərəkatının (1988-1991) öncül şəxslərindəndir, Xalq Cəbhəsinin, Müsavat Partiyasının üzvü olub.
2015-ci ildən fəaliyyət göstərmiş Azərbaycan Demokratiya və Rifah Hərəkatının varisi olan ADR Partiyası 2021-ci ildə yaradılıb. Dövlət qeydiyyatı olmayan partiyaya London İqtisadiyyat Məktəbinin professoru Qubad İbadoğlu sədrlik edir. O, iyulun 23-də həbs edilib. İstintaq mütəşəkkil dəstənin saxta xarici valyuta hazırlaması, əldə etməsi, satması ittihamı ilə aparılır.
