Natiq Cəfərli Şimali Kiprdən nə yazır?
Şimali Kipr Türk Respublikasında istirahət edən iqtisadçı, siyasətçi Natiq Cəfərli təəssüratlarını bölüşüb. Novator.az-ın məlumatına görə, o, bahalıqdan gileylənir: “Lirə ilə qiymətlər çox qalxıb, yerli əhali üçün dəhşətli bahalıqdır. Bütün iqtisadiyyat, maliyyə siyasəti Türkiyədən, lirədən asılı olduğu üçün məzənnə fərqinə, idxal mallarına görə qiymətlər uçur.
2022-ci ildə balıq, dəniz məhsullarından ibarət 4 nəfərlik şam yeməyi 600-650 lirə idi, indi 1000-1300 arasıdır. Marketdə 10 günlük yaxşı bazarlığın xərci keçən illə müqayisədə 1200-1300 lirədən 2500-3000 lirəyə qalxıb. Əhali çox narazıdır. Orta maaş 25-30 min lirədir. Bu, 1000 dollara yaxın məbləğdir. Ötən il orta maaş 1400 dollar həndəvərində idi”.
Hazırda 1 ABŞ dolları 26,9 lirədən bahadır.
1983-cü il noyabrın 15-də qurulan Şimali Kipr Türk Respublikasını yalnız Türkiyə müstəqil dövlət kimi tanıyır.
Azərbaycan Mərkəzi Bankı avqustun 2-də 100 Türkiyə lirəsini 6 manat 30 qəpiyə satır.
2023-cü il 9 manat 7 qəpiklə start götürüb, fevralın əvvəlində kurs 9 manat 4 qəpik, martın əvvəlində 9 manat, aprelin əvvəlində 8 manat 86 qəpik, mayın əvvəlində 8 manat 74 qəpik, iyunun əvvəlində 8 manat 19 qəpik, iyulun əvvəlində 6 manat 53 qəpik, avqustun əvvəlində 6 manat 31 qəpik olub.
2021-2022-ci illərdə 100 lirənin rəsmi kursu 22 manat 91 qəpikdən 9 manat 9 qəpiyə düşüb.
