Cəbhəçinin cəzası yüngülləşə bilər
Bakı Apellyasiya Məhkəməsi AXCP üzvü Pünhan Kərimovun cinayət işini yenidən araşdırır. “Turan”ın məlumatına görə, hazırlıq iclası avqustun 1-də keçirilib, işə mahiyyəti üzrə baxış prosesi avqustun 15-nə təyin olunub.
Pünhan Kərimov 2018-ci il oktyabrın 8-də mühacirətə gedib, ancaq sığınacaq ala bilməyib, 2021-ci il noyabrın 24-də Almaniyadan Azərbaycana qaytarılıb.
2022-ci il yanvarın 25-i Bakıda həbs edilən Pünhan Kərimov satış məqsədi ilə qanunsuz olaraq külli miqdarda narkotik vasitə saxlamada təqsirli bilinib. İyulun 27-də Bakı Ağır Cinayətlər Məhkəməsi ona 6 il azadlıqdan məhrumetmə cəzası kəsib, oktyabrın 3-də Bakı Apellyasiya Məhkəməsi cəzanı 5 ilə endirib.
Cəbhəçi və müdafiəçiləri ittihamı saxta sayır.
2023-cü il mayın 16-da Ali Məhkəmə Pünhan Kərimovun şikayətinə baxaraq işi Bakı Apellyasiya Məhkəməsinə qaytarıb. Cəbhəçinin ittihamının satış məqsədi olmadan qanunsuz olaraq narkotik vasitəni şəxsi istehlak miqdarından artıq miqdarda saxlama ittihamına dəyişdiriləcəyi ehtimalı var. Bu ittiham maksimum 3 ilədək müddətə azadlıqdan məhrumetmə cəzası nəzərdə tutur.
