Sənəd mübadiləsində yeni qayda
Avqustun 1-də prezident İlham Əliyev dövlət orqanları (qurumları) arasında sənəd mübadiləsinin elektronlaşdırılmasına fərman verib. Fərman Elektron Hökumət İnformasiya Sisteminin infrastrukturunda Rəqəmsal Sənəd Dövriyyəsi altsistemi yaradılmasını nəzərdə tutur.
Rəqəmsal İnkişaf və Nəqliyyat Nazirliyinə altsistemin sentyabrın 1-dək formalaşdırılmasını təmin etmək tapşırılıb.
Nazirlər Kabineti idarələrarası elektron sənəd dövriyyəsi sistemi ilə bağlı təkliflərini dörd ay müddətində təqdim etməlidir.
Prezident Administrasiyası, Nazirlər Kabineti, Prezidentin İşlər İdarəsi, Milli Məclis, Konstitusiya Məhkəməsi, Ali Məhkəmə, Baş Prokurorluq, Mərkəzi Bank, Hesablama Palatası, Ombudsman Aparatı, Məhkəmə-Hüquq Şurasının Aparatı, Mərkəzi Seçki Komissiyasının Katibliyi, Korrupsiyaya Qarşı Mübarizə üzrə Komissiyanın Katibliyi, Audiovizual Şurasının Aparatı, Azərbaycan Kredit Bürosu, İcbari Sığorta Bürosu altsistem formalaşdırıldıqdan sonra elektron sənəd dövriyyəsi sistemlərini altsistemə inteqrasiya etməklə digər dövlət orqanları (qurumları) ilə sənəd mübadiləsinin həmin altsistem üzərindən aparılmasını təmin etməlidir.
Mərkəzi icra hakimiyyəti orqanları 2023-cü il noyabrın 1-dək, yerli icra hakimiyyəti orqanları, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslər və dövlət adından yaradılan publik hüquqi şəxslər 2024-cü il avqustun 1-dək mövcud elektron sənəd dövriyyəsi sistemlərini altsistemə inteqrasiya etməklə digər dövlət orqanları (qurumları) ilə sənəd mübadiləsinin həmin altsistem üzərindən aparılmasını təmin etməyə borcludur.
Elektron sənəd dövriyyəsi sistemləri mövcud olmayan dövlət orqanları (qurumları) altı ay müddətində elektron sənəd dövriyyəsi sistemlərinin yaradılması ilə bağlı tədbirlər görməlidir.
