Gələn mövsümün formatı
2024-2025 mövsümündən UEFA-nın klub turnirlərində yeni format tətbiq olunacaq. Novator.az bildirir ki, əsas raundlar vahid liqa sistemi ilə oynanacaq, qruplarda 36 komanda yarışacaq. Çempionlar Liqası və Avropa Liqası qruplarında komandalar 8 oyun (4-ü evdə, 4-ü səfərdə), Konfrans Liqasında 6 oyun (3-ü evdə, 3-ü səfərdə) keçirəcək.
Hər üç turnirin qruplarında ilk 8 pilləni tutan komandalar növbəti mərhələyə vəsiqə alacaq, 9-24-cü yerlərdəki komandalar bundan ötrü daha iki oyuna (evdə və səfərdə) çıxacaq.
İlkin sxemə görə, Çempionlar Liqasına 84 komanda buraxılır. 29 komanda qrupa birbaşa vəsiqə alır, qalan 7 bilet təsnifatlara çıxarılır. 5 vəsiqə dörd mərhələdən ibarət çempionlar yolu ilə, 2 vəsiqə üç mərhələdən ibarət liqalar yolu ilə əldə olunur.
Birinci mərhələdə ələnən komandalar Konfrans Liqasına, sonrakı mərhələlərdə uduzanlar Avropa Liqasına köçür.
Azərbaycan çempionu çempionlar yolunun ilk mərhələsində start götürür.
Turnir 2024-cü il iyulun 9-da başlayıb 2025-ci il mayın 31-də bitəcək. Finala Almaniyanın Münhen şəhəri ev sahibliyi edəcək.
Avropa Liqasına 46 komanda dəvət alır. Qrupa 13 birbaşa vəsiqə var. Dörd təsnifat mərhələsinin hər birində və Çempionlar Liqasından köçmüş komandalar üçün ayrıca təsnifatda ələnənlər Konfrans Liqasına adlayır.
Azərbaycan kubokunun sahibi turnirə birinci mərhələdən başlayır.
Turnir 2024-cü il iyulun 11-də start götürüb 2025-ci il mayın 21-də yekunlaşacaq. Final İspaniyanın Bilbao şəhərinə təyin olunub.
Konfrans Liqasına 113 komanda vəsiqə alır. Qrup yolunda dörd təsnifat mərhələsi və o biri iki turnirdən ələnmiş komandalar üçün üç təsnifat raundu var.
Azərbaycan çempionatının gümüş və bürünc mükafatçıları turnirə ikinci mərhələdən qoşulur.
Turnir 2024-cü il iyulun 11-də başlayıb 2025-ci il mayın 28-də yekunlaşacaq. Final matçı Polşanın Vrotslav şəhərində keçiriləcək.
