“Elxan Əliyevin yeganə “təqsiri”
AXCP sədri Əli Kərimli məhbus partiyadaşı Elxan Əliyevdən yazıb.
Elxan Əliyevi iyulun 26-da Sabunçu Rayon Polis İdarəsinin əməkdaşları tutub. İyulun 27-də Sabunçu Rayon Məhkəməsi onun barəsində 3 aylıq həbs qətimkan tədbiri seçib.
Bakı İstintaq Təcridxanasında saxlanan cəbhəçi daha iki nəfərlə birgə külli miqdarda ziyan vurmaqla dələduzluq, hüquq verən rəsmi sənədi saxtalaşdırma və bilə-bilə saxta sənədlərdən istifadə etmədə təqsirli bilinir. Onların Nardaran qəsəbəsində bir nəfərə saxta sənədlə 57000 min manata torpaq sahəsi satdığı bəyan olunub.
Əli Kərimli yazır ki, Elxan Əliyev şərlənib: “Elxan Əliyevin yeganə “təqsiri” əqidəli, mübariz olması, haqsızlığa susmamasıdır. Onun 3 azyaşlı uşağı var. Kirayədə yaşayırlar. Elxan bəy ağır xəstədir, son aylarda iki dəfə insult keçirib. Hər zaman həyatını itirə bilər. Elxan bəyin həyatına görə şəxsən İlham Əliyev məsuliyyət daşıyır”.
Cinayət Məcəlləsinə görə, külli miqdarda ziyan vurmaqla dələduzluq 5 ildən 10 ilədək müddətə azadlıqdan məhrumetmə ilə cəzalandırılır.
Hüquq verən rəsmi sənədi saxtalaşdırmanın maksimum cəzası 2 ilədək müddətə azadlıqdan məhrumetmədir.
Bilə-bilə saxta sənədlərdən istifadə etməyə maksimum 1 ilədək müddətə azadlıqdan məhrumetmə cəzası düşür.
İyulun 28-də Novator.az-a danışan vəkil Nemət Kərimli deyib ki, Elxan Əliyevin həbsindən Bakı Apellyasiya Məhkəməsinə şikayət veriləcək.
