Yarım ilin maliyyə yoxlamaları
Maliyyə Nazirliyi bildirir ki, Dövlət Maliyyə Nəzarəti Xidməti 2023-cü ilin birinci yarısında büdcədən vəsait alan 72 təşkilatda nəzarət tədbirləri həyata keçirib: “Prokurorluq və hüquq mühafizə orqanlarının məktubları və qərarları əsasında 2015-ci ildən 2023-cü ilə qədər olan dövrü əhatə etməklə 57 təşkilatda yoxlamalar aparılıb. Həmin təşkilatlarda 48 milyon 300,4 min manat məbləğində artıq və əsassız ödənişlər, 131 milyon 902,9 min manat məbləğində gömrük ödənişlərinin az hesablanıb büdcədən yayındırıldığı aşkar edilib. Aşkar edilmiş nöqsanlara hüquqi qiymət verilməsi üçün yoxlamaların nəticələrinə dair tərtib edilmiş aktlar prokurorluq və hüquq mühafizə orqanlarına göndərilib.
Dövlət Maliyyə Nəzarəti Xidməti həmçinin 15 təşkilatda 2019-cu ildən 2023-cü ilə qədər olan dövrü əhatə etməklə vəsaitin istifadəsini yoxlayıb. Həmin təşkilatların 14-də 1 milyon 150,1 min manat artıq və əsassız ödənişlərə yol verildiyi bilinib. Artıq və əsassız ödənişlərin nəzarət tədbirlərinin gedişində dövlət büdcəsinə tam bərpası təmin edilib. 1 təşkilatda aşkar edilmiş 3 milyon 151,9 min manat məbləğində artıq və əsassız ödənişlərə hüquqi qiymət verilməsi üçün yoxlama materialları Baş Prokurorluğa göndərilib.
Nöqsanlara yol vermiş 22 nəfər vəzifəli şəxsə 20,4 min manat məbləğində cərimələr tətbiq olunub və həmin cərimələrin dövlət büdcəsinə ödənməsi təmin edilib”.
