Cəbhəçi niyə tutulub?
Sabunçu Rayon Polis İdarəsinin əməkdaşları iyulun 26-da AXCP funksioneri Elxan Əliyevi tutub. Rəsmi iddiaya görə, cəbhəçi saxlanan daha iki nəfərlə birgə külli miqdarda ziyan vurmaqla dələduzluq, hüquq verən rəsmi sənədi saxtalaşdırma və bilə-bilə saxta sənədlərdən istifadə etmədə şübhəli bilinir. Onların Nardaran qəsəbəsində bir nəfərə saxta sənədlə 57000 min manata torpaq sahəsi satdığı vurğulanır.
İyulun 27-də Sabunçu Rayon Məhkəməsi Elxan Əliyev barəsində 3 aylıq həbs qətimkan tədbiri seçib.
Partiyadaşları ittihamları qurama sayır, tutulmanı Elxan Əliyevin siyasi fəaliyyəti ilə bağlayır.
Hazırda AXCP-nin 6 üzvü azadlıqdan məhrumetmə cəzası çəkir.
Novator.az bildirir ki, 2020-ci ildə tutulan Niyaməddin Əhmədov 13 il müddətinə azadlıqdan məhrum edilib. O, terrorçuluğu maliyyələşdirmə; qanunla mülki dövriyyədə olmasına yol verilməyən (mülki dövriyyədən çıxarılmış) əşyaları qanunsuz olaraq hazırlama, əldə etmə, saxlama, daşıma, gəzdirmə, başqasına vermə və ya satma; dövlət əleyhinə yönələn açıq çağırışlar etməyə hazırlıqda təqsirli bilinib.
2021-ci ildə tutulan Aqil Hümmətov ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurmada ittiham olunaraq 10 il azadlıqdan məhrumetmə cəzası alıb.
2021-ci ildə tutulan Mütəllim Orucov satış məqsədi ilə qanunsuz olaraq külli miqdarda narkotik vasitə saxlamada təqsirli bilinərək 7 il müddətinə azadlıqdan məhrum edilib.
2021-ci ildə tutulan Şahin Hacıyev satış məqsədi ilə qanunsuz olaraq külli miqdarda narkotik vasitə saxlamada təqsirli bilinərək 6 il müddətinə azadlıqdan məhrumetmə cəzası alıb.
2022-ci ildə tutulan Pünhan Kərimov satış məqsədi ilə qanunsuz olaraq külli miqdarda narkotik vasitə saxlamada təqsirli bilinərək 5 il müddətinə azadlıqdan məhrum olunub.
2023-cü ildə tutulan Zamin Salayevə 4 il müddətinə azadlıqdan məhrumetmə cəzası kəsilib. O, silah tətbiq etməklə xuliqanlıqda təqsirli bilinib.
Daha bir cəbhəçi cinayət ittihamı ilə həbsdədir. 2022-ci ildə tutulan Razi Alışova narkotik vasitə satmaq ittihamı irəli sürülüb. Bu ittiham 3 ildən 7 ilədək azadlıqdan məhrumetmə cəzası nəzərdə tutur.
1989-cu ildə yaradılan Azərbaycan Xalq Cəbhəsi (AXC) 1995-ci ildə partiyaya çevrilib. 2000-ci ildən AXCP-yə Əli Kərimli liderlik edir.
