Xələf Xələfovun vəzifəsi dəyişdi
Xələf Əli oğlu Xələfov xarici işlər nazirinin müavini, prezidentin sərhəd və Xəzər dənizi məsələləri üzrə xüsusi nümayəndəsi vəzifələrindən çıxarılaraq prezidentin xüsusi tapşırıqlar üzrə nümayəndəsi təyin edilib. Dövlət başçısı İlham Əliyev sərəncamları iyulun 24-də imzalayıb.
1959-cu il təvəllüdlü Xələf Xələfov Kiyev Dövlət Universitetini və SSRİ Xarici İşlər Nazirliyinin Diplomatik Akademiyasını bitirib.
1983-1990-cu illərdə Azərbaycanın Daxili İşlər Nazirliyində çalışıb.
1991-ci ildən Azərbaycan Xarici İşlər Nazirliyinin Konsulluq İdarəsinin 2-ci katibi, 1992-ci ildən Müqavilə-Hüquq İdarəsinin rəisi, 1997-ci ildən xarici işlər nazirinin müavini olub.
2018-ci il dekabrın 13-də Nazirlər Kabineti Aparatının rəhbəri vəzifəsinə təyinat alıb.
2019-cu il mayın 3-də Xələf Xələfov yenidən xarici işlər nazirinin müavini vəzifəsinə gətirilmiş, ona prezidentin sərhəd və Xəzər dənizi məsələləri üzrə xüsusi nümayəndəsi vəzifəsi də həvalə olunmuşdu.
