İlk ələnmələr
2023-2024 mövsümündə UEFA-nın klub turnirlərinə 234 komanda buraxılıb. Novator.az bildirir ki, Çempionlar Liqasında iki, Konfrans Liqasında bir raundun ardından 31 komanda mübarizəni dayandırıb (Rusiya yarışlardan kənardır, Lixtenşteyn yeganə təmsilçisini itirib).
Avropa Liqası hələ start götürməyib.
Azərbaycanı Çempionlar Liqasında təmsil edən “Qarabağ” birinci mərhələdə Cəbəllütariqin “Linkoln” komandasını ələyib, ikinci raundda “Rakov”la (Polşa) üz-üzə gələcək.
Konfrans Liqasındakı Azərbaycan təmsilçiləri turnirə ikinci mərhələdən qoşulur. “Qəbələ”yə Kiprdən “Omoniya”, “Sabah”a Latviyadan RFS, “Neftçi”yə Bosniyadan “Jelezniçar” qismət olub.
55 üzvü olan UEFA-nın klub reytinqində Azərbaycan 29-cu pillədə qərar tutur.
Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır. Qrup mərhələsi və sonrakı raundlar üçün 1-5 arası bonus xalları da var. Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Azərbaycan bu mövsüm 0,500 əmsal əldə edib.
