Türkiyə Mərkəzi Bankından faiz qərarı
İyulun 20-də Türkiyənin Mərkəzi Bankı banklara verilən borclar üzrə faiz dərəcəsini – uçot dərəcəsini 17,5 faizə qaldırıb.
Novator.az bildirir ki, iyunun 22-də uçot dərəcəsi 8,5 faizdən 15 faizə yüksəlmişdi.
Qərarlar Türkiyə lirəsinin dəyər itirməsini cilovlamağa yönəlib. Hazırda 1 ABŞ dolları 26,9 lirəyə təklif olunur.
İqtisadçı alim, siyasətçi Qubad İbadoğlu yazır ki, Türkiyədə inflyasiyanın 60 faizi ötdüyü nəzərə alınsa, uçot dərəcəsinin qaldırılması ən azı 2023-cü ilin sonunadək davam edə bilər: “Təbii ki, bu dəyişikliklər türk lirəsinin kursuna da təsirsiz ötüşməyəcək”.
İyulun 20-də Azərbaycan Mərkəzi Bankı 100 lirəni 6 manat 33 qəpiyə satır.
2023-cü il 9 manat 7 qəpiklə start götürüb, fevralın əvvəlində kurs 9 manat 4 qəpik, martın əvvəlində 9 manat, aprelin əvvəlində 8 manat 86 qəpik, mayın əvvəlində 8 manat 74 qəpik, iyunun əvvəlində 8 manat 19 qəpik, iyulun əvvəlində 6 manat 53 qəpik olub.
2021-2022-ci illərdə 100 lirənin rəsmi kursu 22 manat 91 qəpikdən 9 manat 9 qəpiyə düşüb.
