Cəlilabad Dövlət Peşə Təhsil Mərkəzi
Prezident İlham Əliyev iyulun 20-də Cəlilabad rayonuna baş çəkib. AZƏRTAC xəbər verir ki, o, Cəlilabad Dövlət Peşə Təhsil Mərkəzinin açılışında iştirak edib.
Arayışa görə, Azərbaycanda 98 peşə təhsil müəssisəsi, 14 peşə təhsil mərkəzi var, 120 ixtisas üzrə 23 min 600 tələbə peşə təhsili alır.
Cəlilabad Dövlət Peşə Təhsil Mərkəzində 25 sinif otağı, 3 laboratoriya, 13 emalatxana, informatika kabineti, STEAM Mərkəzi, praktiki məşğələ otağı, kitabxana, 252 yerlik akt zalı, 128 yerlik yeməkxana, idman zalları və meydançaları, avtotəmir binası, maldarlıq ferması və digər köməkçi binalar yerləşir.
Peşə Təhsil Mərkəzində qənnadıçı, şirniyyatçı, dərzi, kompüterlərin təmiri və xidməti üzrə texnik, mühasibat uçotu, qrafik dizayner, veb-dizayn və proqram təminatı, çilingər-santexnik, geniş profilli traktorçu-maşinist, elektrik montyoru, bərbər-vizajist-manikürçü, avtomobillərin təmiri çilingəri, avtomobil sürücüsü, mebel ustası istiqamətləri, fermer, bitkiçilik, heyvandarlıq və baytarlıq üzrə mütəxəssislər hazırlanacaq.
