Əli Kərimli: “Hanı bərabər imkanlar?”
Bakı Şəhər İcra Hakimiyyəti AXCP Ali Məclisinin sessiyasına yer ayırmır. Partiya sədri Əli Kərimli iyulun 18-də belə açıqlama yayıb. Novator.az-ın məlumatına görə, siyasətçi qeyd edir ki, təkidli müraciətlərinə baxmayaraq Bakı Şəhər İcra Hakimiyyəti AXCP Ali Məclisinin sessiyasını keçirməyə yer vermir: “Ali Məclis rəhbərliyinin və Rəyasət Heyətinin seçilməsi üçün sessiya mütləq keçirilməlidir. Maneə hakimiyyətin hətta mürtəceliyi ilə məşhur “Siyasi partiyalar haqqında” qanuna da əməl etmədiyini göstərir. Həmin qanuna görə, dövlət qeydiyyatından keçmiş bütün siyasi partiyaların sərbəst fəaliyyətinə təminat, siyasi partiyaların fəaliyyətlərinin həyata keçirilməsinə bərabər şərait yaradılmasına təminat verilir. Bəs hanı dövlətin vəd etdiyi sərbəst fəaliyyət imkanı, bərabər imkanlar? Hakim partiyanın bütün ölkə boyu təmtəraqlı qərargahları olduğu halda bizə ofis, iclas keçirməyə yer verməyən hakimiyyətin siyasi partiyalara bərabər imkan vəd etməsi siyasi riyakarlıq deyilmi?”
İyunun 24-ü Bakıda, Maştağa Mədəniyyət Mərkəzində AXCP-nin qurultayı keçirilib, Əli Kərimli yenidən partiya sədri seçilib, Mərkəzi Nəzarət-Təftiş Komissiyası formalaşıb, Ali Məclis üzvləri təsdiqlənib.
Azərbaycan Xalq Cəbhəsi (AXC) 1989-cu ildə yaradılıb, 1995-ci ildə partiyaya çevrilib, həmin il dövlət qeydiyyatına alınıb.
Əli Kərimli AXCP-yə 2000-ci ildən rəhbərlik edir, sədr postuna ilk dəfə 2001-ci ildə mandat alıb.
2006-cı ildən bəri AXCP qərargahsız fəaliyyət göstərir.
