Məhkəmə sabiq məhbusun işi üzrə yekun qərar verdi
İyulun 18-də Bakı Apellyasiya Məhkəməsi sabiq məhbus Şahin Novruzlunun işi üzrə yekun qərar çıxarıb. Qərar dövlətin Şahin Novruzluya təzminat ödəməsini və ailəsinə məxsus pulu qaytarmasını nəzərdə tutur.
Novator.az bildirir ki, 2013-cü ildə Zaur Qurbanlı, Rəşadət Axundov, Rəşad Həsənov, Üzeyir Məmmədli, Bəxtiyar Quliyev, İlkin Rüstəmzadə və Məmməd Əzizovla birgə tutulan 1995-ci il təvəllüdlü Şahin Novruzlu əsasən kütləvi iğtişaş cəhdində təqsirli bilinərək 6 il müddətinə azadlıqdan məhrum olunub, 2014-cü il oktyabrın 17-də əfv edilib.
Bir çox yerli və beynəlxalq hüquq müdafiə təşkilatı Şahin Novruzlunu siyasi məhbus sayıb.
2021-ci il fevralın 18-də Avropa İnsan Hüquqları Məhkəməsi Şahin Novruzlunun Avropa İnsan Hüquqları Konvensiyası ilə verilmiş hüquqlarının pozuntusunu tanıyıb, Azərbaycan dövlətinin ona 22 min avro təzminat ödəməsi barədə qərar çıxarıb.
2022-ci il sentyabrın 30-da Ali Məhkəmənin Plenumu Şahin Novruzluya bəraət verib.
Şahin Novruzlu Nəsimi Rayon Məhkəməsinə üz tutaraq maddi və mənəvi təzminat tələbi irəli sürüb. 2023-cü il martın 17-də məhkəmə dövlətin ona 20 min manat mənəvi zərər əvəzi ödəməsinə, tutulan vaxt evlərindən götürülmüş, məhkəmə qərarı ilə müsadirə olunmuş 94,6 min manatın qaytarılmasına qərar verib.
Maliyyə Nazirliyi bununla razılaşmayaraq Bakı Apellyasiya Məhkəməsinə şikayət edib. Bakı Apellyasiya Məhkəməsi iyulun 18-də şikayəti təmin etməyib, aşağı məhkəmə instansiyasının qərarını qüvvədə saxlayıb.
