Sabiq məhbusa nə qədər təzminat ödənəcək?
Bakı Apellyasiya Məhkəməsi sabiq məhbus Məmməd Əzizovun şikayətini qismən təmin edib. “Turan”ın 17 iyul məlumatına görə, qərar dövlətin Məmməd Əzizova 66700 manat təzminat ödəməsini nəzərdə tutur.
Məmməd Əzizov 100 min manat təzminat istəyirdi.
2013-cü ildə Zaur Qurbanlı, Rəşadət Axundov, Rəşad Həsənov, Üzeyir Məmmədli, Şahin Novruzlu, Bəxtiyar Quliyev, İlkin Rüstəmzadə ilə birgə tutulan 1992-ci il təvəllüdlü Məmməd Əzizov 2014-cü ildə 7 il 6 ay müddətinə azadlıqdan məhrum olunub. Əsasən kütləvi iğtişaş cəhdində təqsirli bilinən fəal 2016-cu il martın 17-də əfv edilib.
Bir çox yerli və beynəlxalq hüquq müdafiə təşkilatı Məmməd Əzizovu siyasi məhbus sayıb.
Avropa İnsan Hüquqları Məhkəməsi fəalın şikayəti üzrə 2021-ci il fevralın 18-də açıqladığı qərarda onun Avropa İnsan Hüquqları Konvensiyası ilə verilmiş hüquqlarının pozulduğunu bəyan edib, Azərbaycan dövlətinə 21 min 500 avro cərimə kəsib.
2022-ci il sentyabrın 30-da Ali Məhkəmənin Plenumu Məmməd Əzizova bəraət verib.
Nəsimi Rayon Məhkəməsinə müraciətində fəal ona dəymiş mənəvi zərər əvəzi 100 min manat təzminat tələb edib. 2023-cü il martın 15-də məhkəmə dövlətin ona 36 min manat təzminat ödəməsi barədə qərar çıxarmış, ancaq fəal məbləği yetərli saymayaraq apellyasiya şikayəti vermişdi.
