Hüseyn Məlik partiyadaşına zəng vurub
Azərbaycan Demokratiya və Rifah (ADR) Partiyasının İdarə Heyətinin üzvü Hüseyn Məlik Daxili İşlər Nazirliyinin Binəqədi rayonundakı inzibati həbs məntəqəsində saxlanır. Novator.az-ın məlumatına görə, iyulun 17-də o, partiya sədrinin müavini Ədalət Yusuba zəng vuraraq deyib ki, iyulun 14-ü paytaxtın 3-cü mikrorayon dairəsi yaxınlığında avtomobilindən düşürülərək tutulub.
Ədalət Yusubun sözlərinə görə, Hüseyn Məlikin avtomobili tutulduğu ərazidən evinin həyətinə aparılıb.
İyulun 14-ü axşam Nəsimi Rayon Məhkəməsi Hüseyn Məlikə 20 sutkalıq inzibati həbs cəzası kəsib. O, polis işçisinin qanuni tələbinə qəsdən tabe olmamaqda təqsirli bilinib.
ADR-in İdarə Heyəti bəyanat yayaraq həbsi Hüseyn Məlikin həm ictimai həyatda, həm də sosial şəbəkələrdə siyasi fəallığı ilə əlaqələndirib.
Hüseyn Məlik xalq hərəkatının (1988-1991) öncül şəxslərindəndir, əvvəllər Xalq Cəbhəsinin, sonra Müsavat Partiyasının üzvü olub.
2015-ci ildən fəaliyyət göstərmiş Azərbaycan Demokratiya və Rifah Hərəkatının varisi olan ADR Partiyası 2021-ci ildə yaradılıb. Dövlət qeydiyyatına alınmayan quruma iqtisadçı alim Qubad İbadoğlu sədrlik edir.
